روايه كاملة للكاتبة المبدعه جهاد عامر مكتملة الاجزاء

التقل كل ما تكوني تقيلة على الراجل اللي معاكي كل ما كنتي أبعد وكل ما هو جري وراك أكتر وأكتر ..
صباح الخير على أحلى اتنين ستات قمرات في الكوكب والكواكب والمجرات المجاورة..
كانت ماما وخالتو وآدم قاعدين بيفطروا وطبعا لاحظتوا إني ماعبرتش آدم وفهمته إنه كيس بلاستيك شفاف..
صباح النور على أحلى بكاشة في الدنيا ايه اللي مصحيكي بدري كدا انتي مش المفروض هتروحي المستشفى الضهر!
لا يا خالتو خدت شيفت واحدة صاحبتي انهاردة عشان بكرة عيد ميلاد مليكة وهيا هتاخد شيفت بكرة مكاني.. أمال هيا فين البت دي هيا وأمها صحيح مش سامعة لهم صوت والبيت هادي كدا..
ردت ماما وهيا بتضحك
صحيت بدري وراحت على بيتها لإن يوسف رجع من السفر الفجر وواحشها.. دا حتى ما استنتش أما آدم يصحى عشان يوصلها..
ربنا يسعدهم يارب على كدا بقى مش هتعمل عيد ميلاد مليكة هنا!
_ لا انتي عارفة يوسف بيحب يعمل مناسباته ف بيته وكمان عشان أهله وأخواته..
امممم طب أمشي أنا بقى عشان ألحق أخلص بدري وأجيب هدية مليكة وأنا راجعة..
طبعا دا كله وأنا بكلم ماما وخالتو ومابصتش ناحية الأخ اللي قاعد معاهم بس لمحته بطرف مناخيري من آن لآخر كدا وهو بيبص عليا..
طب ما تستني وآدم يوصلك ف طريقه!!
لا يا خالتو مافيش داعي في حد هيعدي عليا وأكيد مستنيني دلوقتي.. سلام.
مابصتش على رد فعله لإني عرفته من نظرة ماما وابتسامتها الخبيثة ففهمت إنه بيطلع دخان من ودانه دلوقت.. يلا ربنا يعينه ع اللي لسه جاي بقى ..
خۏفت يطلع ورايا ويعرف إن مافيش كلبة بلدي حتى معبراني وساعتها هيبقى شكلي قدامه فانلة مقطعة والله بس الحمد لله ركبت تاكسي وماكنش لسه طلع.. أكيد ماما العظمة اتصرفت..
2 استغلي نعم ربنا عليك
الجمال نعمة ربنا ادهالنا.. وكل بنت لها جمالها الخاص والمميز مافيش بنت وحشة أو بنت ملامحها أو جسمها مش مثالي.. بس النقطة الفارقة إن البنت الشاطرة و الواثقة من نفسها هيا اللي تعرف تبين جمالها دا وتفرضه على كل الناس ومش بس كدا دي تخليهم ينبهروا بيها ويتمنوا يشوفوها كل شوية كمان.. ومش عيب إنك تحبي جمالك وتفرحي بيه بس الغلط إنك تستخدمي جمالك دا في أسلوب غلط أو تفتخري بيه لإنك مش انتي اللي عملتيه أولا و ثانيا إنه مش دايم يا حبيبتي..
انهاردة عيد ميلاد مليكة قعدت طول النهار مع حور عشان بجهز معاها للحفلة.. خلصنا وفاضل كام ساعة والحفلة تبدأ ولإني مش بعرف أنام أو البس غير في أوضتي روحت البيت عشان أجهز.. وطبعا لإن ماما وخالتو مع حور وعلى ما أروح وأجهز وآجي تاني هيكون الجو بقى ليل.. يبقى لازم حد ييجي ياخدني.. من البيت لبيت حور ف تفتكروا مين اللي هيقوم بالمهمة دي!!!!
براڤوا عليكوا هو بالظبط اللي جه ف بالكوا... آدم!
لبست فستان وطرحة وجزمة من نفس اللون.. أحمر اللون الأقرب لقلبي وحطيت ميكب _على غير العادة_ خفيف وخدت هدية مليكة وشنطتي وخرجت لإنه أكيد دلوقتي واقف برا أصله بقالوا نص ساعة متصل وقايل إنه خمس دقايق ويكون قدام البيت والمعروف عن آدم إنه بيكره الانتظار فوق الخيال..
طلعت لقيته باصص ف الأرض وباين عليه العصبية
ماكنتش نص ساعة اللي أتأخرت عليك فيهم دول دا انت قفوش أوي!!!
قربت منه شوية ف رفع عينه لما سمع صوت خطواتي.. الظاهر كان هيزعق أو هيشتم بس لما شافني سكت.. هو سكت بس عيونه لمعت وشوفت ابتسامته فيهم...
عارفين شعور البنت لما تشوف لمعة عيون حبيبها بمجرد ما يشوفها! طب تعرفوا إن الشعور دا أحسن من مليون كلمة بحبك ما تكونش طالعة من القلب بجد !
مساء الخير يا آدم..
_ مساء الجمال..!! ايه الرقة واللطف والطعامة دول!
بجد يا آدم شكلي رقيق!
كنت بتكلم بصوت هادي ورقيق واللي ماسمعهوش مني من ساعة ما رجع ودا اللي خلاه ينبهر أكتر..
_ مش بس شكلك كلك على بعضك رقيقة يا حواا!!
ودي كانت قاعدة ماما رقم
3 الرقة..
مش مطلوب منك تكوني ست مع كل الرجالة بس مطلوب منك تكوني ست الستات مع راجلك انتي بس.. الراجل يحب الست