قصه كاملة بقلم الكاتبه ندي شكري

_بخيل عيبه إنه بخيل.
_بخيل!! ده معيشك في شقة ترد الروح وعمره ما جه في يوم وقصر في حقك سواء أكل أو شرب أو حتى لبس.
وقتها ضحكت بغلب وقلت_مش دايما البخل بيبقى بخل فلوس أحيانا بيكون بخل مشاعر.
_مش فاهماك يا مريم.
_ولا عمرك هتفهميني يا علا عشان مفيش غيري دايق مره ومكوي بناره.
_ربنا يهديلك الحال.
_بكره أول يوم مدرسة ل ليلى ولازم تكون معايا سواء الصبح وهي رايحة أو في استقبالها وهي راجعة ده هيفرق كتير في نفسيتها.
_مدرسة أيه يا مريم ما كلنا كنا بنروح المدرسة لا كان حد بيودينا ولا حتى بيستقبلنا وادينا كبرنا واتعلمنا استهدي بالله يا مريم وطفي النور وبلاش كلام فاضي وسبيني أنام عشان الشغل.

_كلام فاضي بالنسبة ليك بنتنا كلام فاضي!
_مريم شكلك غاوية خناق وأنا مش فايق.
وقتها قام وطفى الأنوار من بعدها سابني ونام وسهرت أنا باقي ليلتي ب حمزة اللي كان بالفعل طول الليل على صړخة واحدة أثر تعبه مزارش النوم عيوني للحظة لوقت ما المنبه رن جمبي عشان يعلن دخول المعاد اللي من المفترض تصحى فيه ليلى لأجل إنها تروح على مدرستها بالفعل نيمت حمزة على السرير جمب ياسين من بعدها قمت و بدأت أجهز ليها اللانش بوكس الخاص بيها ومنستش أبدا أحضر ل ياسين هو كمان واحد عشان شغله ورغم زعلي منه إلا إنه مبيهونش على قلبي نزلت معاها ودعتها من بعدها ركبتها باص المدرسة وطلعت مرة تانية على شقتي وقتها استقبلني ياسين ب عصبية وهو بيقول_كنت فين يا هانم وسايبة الولد يعيط بالشكل ده
_كنت تحت بوصل ليلى وقلت إنك أكيد هتاخد بالك منه لوقت ما أطلع.
_أه ما أنت مش على بالك حاجة تسيبيه يزن جمبي ويقلق نومي ماهو في داهية شغلي بقى وأقعد أربي للهانم العيال.
_يأخي أنت بجح عديم مسؤلية رامي على كتافي الحمل كله وكأني لوحدي اللي خلفتهم مستخسر حتى إنك تدعمهم ولو بس نفسييا.
رد بشيء من العصبية وقال_أنا ماشي وسيبهالك عشان العيشة في خلقتك تقصر العمر.
قلت وقتها بصوت عالي_مش عايزاك طلقني يا ياسين.
وكان رده على كلامي هو رزع الباب من وراه.
_ بتحبني ولا الهوى عمره ما زارك بتحبني ولا اتكتب على القلب نارك.
كنت بسمع لكلمات الأغنية وتفكيري كله في محاولة الوصول لإجابة لسؤالها أما عن نظراتي ف كانت موجهة للسما ونجومها لوقت ما قطع شرودي صوت ماما وهي بتقول_ممكن تفهميني سايبة بيت جوزك وقاعدة بعيالك هنا ليه!
ابتسمت بكسرة وقلت_أيه يا ماما زهقت مني ومن عيالي أنت كمان!
_يا قلب ماما ده أنا اشيلك أنت وهما العمر كله في عيوني ومملش لحظة بس غريبة إنك سايبة بيتك ده أنت ٦ سنين جواز عمرك ما فكرت تغيبي عن بيتك يوم.
_ بس خلاص جالي وقت وتعبت تعبت من المحاولة.
_في أيه طيب ياسين زعلك
_هو بيعمل ايه غير إنه يزعلني.
_احكيلي يا حبيبتي احكيلي وفضفضي يمكن الحمل عن قلبك يخف.
اتنهدت وأنا بطبطب على كتفها_ مفيش يا ماما مفيش يا حبيبتي ادعيلي بس.
_ربنا يريح بالك ويهدي سرك ويسعد قلبك وأيامك يا بنتي يارب.
من بعدها دخلت وسابتني وقت أما لقت مفيش فايدة من سؤالي عن سبب وجودي وكملت أنا سهرتي ب صحبة الليل ونجومه لوقت ما قطع شرودي مرة تانية صوته_وبعدهالك يا ست مريم.
قمت ورفعت عيوني لبلكونة الدور اللي فوقنا لوقت ما لمحت طلته اللي ارتوى بيها قلبي بعد عطش اسبوع كامل بعيد عن عيونه اتنهدت وسكت.
_لو ليا خاطر عندك لفي وتعالي